ᓛᒐᒥ ᑭᓱᓂᒃ ᓂᕆᐅᒋᔭᕆᐊᖃᕐᓃᑦ
ᓛᒐ ᑐᔪᕐᒥᕕᒃ ᕿᑭᖅᑖᓗᒻᒥᐅᓄᑦ ᐋᓐᓂᐊᕐᕕᓕᐊᖅᑐᑦ/ᒪᓕᑦᑎᖏᑦ ᐊᐅᓚᔾᔪᓰᑦ ᐋᑐᕚᒨᕐᓗᓂ ᐊᒻᒪᓗ ᐊᖏᕐᕋᒧᑦ ᐅᑎᕐᓗᓂ ᓄᓇᕗᒻᒧᑦ 2022
ᓛᒐ ᑐᔪᕐᒥᕕᒋᔭᐅᖃᑦᑕᖅᐳᖅ ᐃᓄᖕᓄᑦ ᐋᑐᕚᒧᑦ ᐃᓅᓕᓴᖅᑕᐅᔭᖅᑐᖅᑐᓄᑦ ᐱᔨᑦᑎᕈᑏᑦ ᓄᓇᖏᓐᓂ ᓄᓇᕗᒻᒥᓗ ᐊᑐᐃᓐᓇᐅᓐᖏᓐᓂᖏᑦ ᐱᔾᔪᑎᒋᓪᓗᒍ. ᑕᐃᒪᓐᖓᓂᑦ ᐊᐃᕐᕆᓕ 2000−ᒥᓂᑦ, ᖃᓪᓗᓈᑦ ᓄᓇᖓᓐᓂ ᓇᔪᒐᖅᑖᖅᑎᑦᑎᓯᒪᕗᒍᑦ ᐃᓄᖕᓂᒃ, ᓄᓇᕗᒻᒥ ᕿᑭᖅᑖᓗᖕᒥᐅᑕᐅᔪᓂᒃ ᖃᓪᓗᓈᑦ ᓄᓇᖓᓐᓄᑦ ᐃᓅᓕᓴᖅᑕᐅᔭᖅᑐᖅᑐᓂᒃ. ᐋᑐᕚᒥ ᐋᓐᓂᐊᕕᓕᐊᖅᓯᒪᔪᓂᒃ ᓇᒧᑐᐃᓐᓇᖅ ᐊᒡᔮᖅᑐᐃᖃᑦᑕᖅᑐᒍᑦ; ᒥᕝᕕᖕᒥᑦ ᒥᕝᕕᖕᒧᑦ; ᐊᖏᕐᕋᒥ ᓂᕿᓕᐅᖅᓯᒪᔪᓂᒃ ᐊᑐᐃᓐᓇᕈᐃᓂᖅ, ᐊᒻᒪ ᐃᖢᕐᕆᔮᕐᓇᖅᑐᓂᒃ ᓴᓗᒪᔪᓂᒡᓗ ᐃᒡᓗᕈᓯᖃᖅᑎᑦᑎᓪᓗᑕ. ᐋᓐᓂᐊᕕᓕᐊᖅᓯᒪᔪᑦ ᐱᔭᕇᖅᑕᐅᔭᕌᖓᑦᑕ ᐊᖏᕐᕋᐅᔾᔪᑎᒃᓴᖏᓐᓂᒃ ᖃᖓᑦᑕᐅᑎᓂᒃ ᐋᖅᑭᒃᓱᐃᖃᑦᑕᕐᒥᔪᒍᑦ. ᓛᒐ ᐃᓄᖕᓄᑦ ᓇᖕᒥᓂᕆᔭᐅᕗᖅ, ᐊᖅᑯᑕᐅᓪᓗᑎᒃ ᓄᓇᓯ ᑯᐊᐳᕇᓴᒃᑯᑦ ᐊᒻᒪ ᕿᑭᖅᑖᓗᒃ ᑯᐊᐳᕇᓴᒃᑯᑦ.
ᑕᒪᐅᓐᖓᔪᑦ ᓯᕗᓪᓕᕐᒥᒃ ᐋᑐᕚᒧᑦ ᑎᑭᑦᑕᕌᖓᑕ ᐸᕐᕆᐊᖅᑕᐅᓯᒪᓲᑦ ᐊᖁᑎᒧᑦ. ᐋᓐᓂᐊᕕᓕᐊᖅᑐᑦ ᖃᖓᑕᓲᒥᑦ ᓂᐅᓯᒪᔪᐃᓐᓇᐅᓕᕌᖓᑕ ᐊᖁᑎᒧᑦ ᓛᒐᓕᐊᕈᔾᔭᐅᖃᑦᑕᖅᑐᑦ, ᐃᒻᒪᖄ ᐊᑯᓂᐅᓂᖓ 20 ᒥᓂᑦᖑᓪᓗᓂ. ᓇᒃᓴᖃᑦᑕᕐᓂᐊᖅᐳᓯ ᓄᓇᕗᒻᒥ ᐋᓐᓂᐊᕕᓕᐊᕈᓐᓇᐅᑏᑦ ᐸᐃᑉᐹᖁᑎᖏᓐᓂᒃ ᐊᒻᒪ ᐊᑕᐅᓯᕐᒥᒃ ᐊᔾᔨᓐᖑᐊᓕᖕᒥᒃ ᑭᓇᐅᓂᕐᓂᒃ ᓇᓗᓇᐃᖅᓯᔾᔪᒻᒥᒃ; ᐅᕝᕙᓘᓐᓃᑦ ᒪᕐᕉᖕᓂᒃ ᐊᔾᔨᓐᖑᐊᖃᓐᖏᑦᑐᓂᒃ ᒐᕙᒪᒃᑯᓐᓂᓐᖔᖅᑐᓂᒃ ᑭᓇᐅᓂᕐᓂᒃ ᓇᓗᓇᐃᖅᓯᔾᔪᑏᖕᓂᒃ.
ᖃᖓ ᐋᑐᕚᒧᑦ ᑎᑭᓐᓂᐊᕐᓃᑦ ᒪᓕᒃᖢᒍ, ᓛᒐᒧᑦ ᑎᑭᑐᐃᓐᓇᕆᐊᖃᖅᑐᑎᑦ ᐅᓐᓄᒍᒥᑕᕐᓇᒥ, ᑕᐃᑯᓐᖓᕈᕕᓪᓗ ᐊᓯᖕᓄᑦ ᑕᐃᑲᓃᓕᕇᖅᑐᓄᑦ ᑐᓐᖓᓱᒃᑎᑕᐅᓂᐊᖅᑐᑎᑦ, ᐊᒻᒪ ᓂᕆᔭᖅᑐᖁᔭᐅᓗᑎᒃ ᓂᕆᔪᒪᒍᕕᑦ. ᐊᑎᓕᐅᖅᑕᐅᕙᓪᓕᐊᓂᕐᓂ, ᖃᐅᔨᒃᑲᖅᑕᐅᓂᐊᖅᑐᑎᑦ ᓇᓕᐊᖕᓂ ᐃᒡᓗᕈᓯᖅᑖᕐᓂᐊᕐᓂᕐᓂᒃ. ᓄᓇᖅᑲᑎᖕᓂᒃ ᑕᐃᑲᓃᑦᑐᖃᑐᐃᓐᓇᕆᐊᓕᒃ. ᑭᓱᓂᒃ ᑎᒦᑦ ᐱᐅᒃᓴᓐᖏᑐᐊᖅᐸᑦ, ᐱᓗᐊᕐᓗᒍ ᓂᕿᒥᒃ ᐱᐅᒃᓴᓐᖏᑉᐸᑦ ᑎᒦᑦ, ᐅᕝᕙᓘᓐᓃᑦ ᖃᓄᐃᑦᑐᓂᒃ ᑭᓯᐊᓂ ᓂᕆᔭᕆᐊᖃᖅᑎᑕᐅᒍᕕᑦ, ᓈᒐᒥ ᐃᖅᑲᓇᐃᔭᖅᑏᑦ ᖃᐅᔨᒃᑲᕐᓂᐊᖅᐸᑎᑦ ᐊᒻᒪ ᐃᖅᑲᓇᐃᔭᖅᑎᓄᑦ ᐋᖅᑭᒃᓱᐃᔾᔪᔾᔭᐅᑦᑎᐊᕐᓂᐊᖅᑐᓂᑦ ᖃᓄᐃᖁᓇᓐᖏᓐᓇᕕᑦ ᐅᓗᕆᐊᓇᖅᑐᒧᐊᖁᔭᐅᓐᖏᓐᓇᕕᓪᓗ.
ᑎᑭᑐᐊᕈᕕᑦ ᐋᓐᓂᐊᕕᓕᐊᑲᐅᑎᒋᔭᕆᐊᖃᕈᕕᓪᓗ, ᐊᖁᑏᑦ ᖃᐅᔨᒃᑲᕐᓂᐊᖅᐸᐃᑦ ᑕᐃᑯᖓ ᐋᓐᓂᐊᕕᖕᒧᑦ ᐊᒡᔭᖅᑕᐅᔪᓐᓇᕐᓂᐊᕋᕕᑦ. ᑕᒫᓃᓐᓂᕐᓂ ᓇᒧᑐᐃᓐᓇᖅ ᐋᓐᓂᐊᕕᓕᐊᕆᐊᖃᕐᓂᕐᓄᑦ ᐊᒡᔭᖅᑕᐅᖃᑦᑕᕐᓂᐊᖅᑐᑎᑦ ᐊᖁᑎᒧᑦ, ᐊᒻᒪ ᐊᐃᔭᐅᖃᑦᑕᕐᓗᑎᑦ. ᐋᓐᓂᐊᕕᓕᐊᕆᐊᖃᕐᕕᒃᓴᖃᕈᕕᑦ ᓛᒐᒥ ᐃᖅᑲᓇᐃᔭᖅᑏᑦ ᖃᐅᔨᒪᓐᖏᑕᖓᓂᒃ, ᐃᖅᑲᓇᐃᔭᖅᑏᑦ ᖃᐅᔨᒃᑲᑲᐅᑎᒋᓂᐊᖅᐸᑎᑦ. ᓛᒐᒃᑯᑦ ᑕᐃᒪᓐᖓᓕᒫᖅ ᑭᓐᖒᒪᔭᐅᔪᓂᒃ ᓴᖅᑭᑦᑎᓴᕋᐃᓐᓇᓱᐃᓐᓇᐅᔭᖅᑐᑦ.
ᓛᒐᒃᑯᓐᓂ ᐃᖅᑲᓇᐃᔭᖅᑏᑦ ᐃᓄᖕᓂᒃ ᐅᐱᒍᓱᑦᑎᐊᖅᐳᑦ ᖃᐅᔨᒪᑦᑎᐊᖅᖢᑎᒡᓗ. ᐊᒥᓱᑦ ᓛᒐᒥ ᐃᖅᑲᓇᐃᔭᖅᑏᑦ ᐃᓄᓪᓚᕆᐅᖕᒥᔪᑦ ᐊᒻᒪ/ᐅᕝᕙᓘᓐᓃᑦ ᐅᑭᐅᖅᑕᖅᑐᒥᐅᑕᑦ ᑎᒥᖁᑎᖏᓐᓂᒃ ᐃᖅᑲᓇᐃᔭᖃᑎᖃᖃᑦᑕᖅᓯᒪᓪᓗᑎᒃ ᐃᓱᒫᓘᑕᐅᔪᓂᒡᓗ ᖃᐅᔨᓯᒪᓪᓗᑎᒃ. ᓛᒐ ᑐᕌᒐᖃᖅᐳᖅ ᑭᒃᑯᓕᒫᓂᒃ ᐃᓚᐃᓐᓈᕆᔭᕆᐊᖃᓐᖏᓐᓂᕐᒥᒃ ᐊᒻᒪ ᑐᓐᖓᓱᒃᑎᑦᑎᓂᕐᒥᒃ ᑭᒃᑯᑐᐃᓐᓇᕐᓂᒃ. ᓇᓕᐊᑐᐃᓐᓇᖅ ᐃᖅᑲᓇᐃᔭᖅᑎ ᖃᐅᔨᒃᑲᕐᓂᐊᖅᐸᐃᑦ ᐃᓱᒫᓘᑎᖃᕐᓂᕈᕕᑦ.
ᓛᒐᒥ ᐊᑕᐅᓯᐅᓐᖏᑦᑐᓂᒃ ᐊᑐᐃᓐᓇᕈᐃᖃᑦᑕᓐᖏᑦᑐᒍᑦ. ᓯᕗᓪᓕᖅ, ᑐᓵᔨᖃᖅᑎᑦᑎᓂᖅ, ᑐᓵᔩᑦ ᐊᑐᐃᓐᓇᕈᖅᑎᑕᐅᖃᑦᑕᕐᒪᑕ ᐋᑐᕚᒥ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᑲᑐᔾᔨᖃᑎᒌᖏᓐᓄᑦ, ᑐᓵᔨᖏᓪᓗ ᐃᓅᓕᓴᐃᓂᐅᑉ ᒥᒃᓵᓄᑦ ᐃᓕᓐᓂᐊᖅᑎᑕᓯᒪᓪᓗᑎᒃ ᐊᒻᒪ ᐊᑐᐃᓐᓇᐅᕙᒃᖢᑎᒃ ᖃᖓᑐᐃᓐᓇᖅ, ᐃᖅᑲᓇᐃᔭᕐᓇᐅᓪᓗ ᐃᑲᕐᕋᖏᑦᑕ ᓯᓚᑖᒍᑦ. ᓛᒐᒃᑯᑦ ᐊᐅᓚᑦᓯᖃᑦᑕᓐᖏᑦᑐᑦ ᐊᑐᐃᓐᓇᕈᐃᕙᓐᖏᑦᑐᓪᓗ ᐃᓅᓕᓴᐅᑎᓂᒃ, ᐅᓂᒃᑲᐅᓯᖃᖅᐸᓐᖏᖢᑎᒡᓗ ᓇᓗᓇᐃᔭᐃᕙᓐᖏᖢᑎᒡᓗ ᐃᓅᓕᓴᐃᓂᐅᑉ ᒥᒃᓵᓅᖓᔪᓂᒃ, ᐊᒻᒪ ᐋᓐᓂᐊᔫᑉ ᐊᑐᕆᐊᖃᖅᑕᖏᓐᓂᒃ ᐱᓯᒪᕙᓐᖏᖢᑎᒃ. ᑕᒪᒃᑯᐊ ᒥᒃᓵᓄᑦ ᐊᐱᖅᑯᑎᖃᑐᐊᕈᔅᓯ, ᐊᐱᕆᓂᐊᖅᐸᑎᑦ ᓛᒐᒥ ᐃᖅᑲᓇᐃᔭᖅᑏᑦ ᐋᑐᕚᒥ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᑲᑐᔾᔨᖃᑎᒌᓂᒃ ᖃᐅᔨᒃᑲᐃᓂᐊᕐᒪᑕ.
ᓛᒐᒥ ᐃᖅᑲᓇᐃᔭᖅᑏᑦ ᖃᐅᔨᒃᑲᐃᔪᒪᕗᑦ ᑕᐅᓄᖓ ᐋᓐᓂᐊᕕᓕᐊᕐᓂᐊᕈᕕᑦ ᑭᓱᑐᐃᓐᓇᕐᓂᒃ ᐊᑐᕆᐊᖃᖅᑕᕐᓂᒃ ᓇᒃᓴᖁᔨᓪᓗᑎᒃ. ᐃᓕᖕᓄᑦ ᐊᑐᕆᐊᓖᑦ, ᓲᕐᓗ ᓄᔭᕐᓄᑦ ᐅᐊᓴᐅᑏᑦ, ᑎᒥᒧᑦ ᑮᓇᕐᓄᓪᓗ ᐅᐊᓴᐅᑏᑦ, ᓇᖐᑦ, ᐅᓐᖏᔭᐅᑏᑦ, ᑭᒍᑎᓯᐅᑏᑦ, ᐊᐅᓈᖅᑐᖅᓯᐅᑏᑦ, ᐃᓯᖅᓯᒪᔾᔪᑏᑦ ᑲᒥᓪᓛᕈᑏᓪᓘᓐᓃᑦ (ᐱᓗᐊᕐᓗᒍ ᐅᑭᐅᒃᑯᑦ).